28 кастрычніка 2020 года ў рамках мерапрыемстваў, прысвечаных 90-годдзю Беларускага дзяржаўнага тэхналагічнага ўніверсітэта, адбыўся навучальны семінар-прэзентацыя для настаўнікаў беларускай і рускай мовы і літаратуры па актуальных пытаннях падрыхтоўкі вучняў да алімпіяды.
Семінар быў падрыхтаваны і праведзены загадчыкам кафедры рэдакцыйна-выдавецкіх тэхналогій Уладзімірам Іванавічам Куліковічам, аўтарам вучэбных дапаможнікаў для школ і ўстаноў вышэйшай адукацыі, пры падтрымцы Інстытута павышэння кваліфікацыі і перападрыхтоўкі БДТУ, выдавецтваў “Аверсэв” і “Рэгістр”.
 |  |
Падчас правядзення семінара адбылася прэзентацыя падручнікаў, а таксама былі дадзены практычныя рэкамендацыі адносна выканання вучнямі алімпіядных заданняў па беларускай мове. Перад настаўнікамі выступілі член журы рэспубліканскага конкурсу навуковых работ, дацэнт кафедры медыялогіі Беларускага дзяржаўнага ўніверсітэта Інга Воюш, дацэнт кафедры РВТ Андрэй Акушэвіч.
 |  |
Настаўнікамі былі адзначаны высокі ўзровень арганізацыі і правядзення семінара, актуальнасць агучаных практычных рэкамендацый і неабходнасць далейшага супрацоўніцтва у галіне распрацоўкі сучасных праграм і метадычнага забеспячэння для якаснай падрыхтоўкі вучняў па беларускай і рускай мове і літаратуры.
Дырэктар Інстытута павышэння кваліфікацыі і перападрыхтоўкі Пішчоў С.М. і дэкан факультэта прынттэналогій і медыякамунікацый Далгова Т.А. расказалі ўдзельнікам семінара аб асноўных напрамках адукацыйнай, культурнай і выхаваўчай дзейнасці выкладчыкаў і студэнтаў БДТУ, а таксама прэзентавалі інфармацыйныя матэрыялы пра спецыяльнасці, асаблівасці прыёму для абітурыентаў.
 |  |
Завяршылася мерапрыемства ў актавай зале, дзе слухачы семінара пабывалі на прэм’еры спектакля народнага студэнцкага тэатра БДТУ “Колокол” “Ода кахання” (гісторыя кахання Адама Міцкевіча).
БДТУ выказвае падзяку ўдзельнікам семінара, а таксама жадае поспехаў і перамог вучням і настаўнікам на алімпіядах па беларускай і рускай мове і літаратуры!
